• Our popular and beloved forums are finally back, after being down since April 2018 due to hosting and server issues. We have now switched to a better platform, while maintenaing all data as it was before (contents and user names) . Thank you for your patience and loyalty. If you have any questions, need to report an error, or are having trouble logging in, please email us at: assyrianvoice@rogers.com

عشر روائح توجد فقط في العراق

ASHOOR

Administrator
Staff member
أولاً: الخليط بين رائحة السمك المسگوف و رائحة الشط في أول ساعات المساء.

ثانياً: رائحة الصمون الحجري المكسّب (مستحيل توصل للبيت كاملة، الگماعة تطير لو يجي القبيس)!

ثالثاً: رائحة حدائق البيوت بما فيها من راسقي و شبوي ليلي و قداح و روز دموي و قرنفل و حلگ السبع وأشجار نارنج ، و مرّات حتى الخيار التعروزي بالسواگي. و طبعاً لازم
الياس عالأطراف!

رابعاً: رائحة العاگول الرطب، خاصة في الطرق الخارجية. و إذا كان السفر شمالاً فيضاف إليها رائحة بطيخ سامراء (أحلى من العسل).

خامساً: رائحة خليط الغداوات العراقية ذات الروائح المميزة الخارقة الحارقة تفوح من الشبابيك مثل: بامية مع تمن عنبر و عكوس لحم غنم، تمن باگلة و شبنت، تمن چمه لو تمن كلم، الخ الخ

سادساً: رائحة الباسطرمة (مال موصل) وية بيض، ريوگ يوم الجمعة. أويلي يابة ! صدك رحم الله والديه اللي إخترعهه للباسطرمة ينرادله جائزة نوبل.

سابعاً: رائحة البخور المختلط مع رائحة ماء الورد في المراقد المقدسة. تحس أنه الدعاء يصعد گبل .

ثامناً: رائحة عرباين اللبلبي الحار بالشتا، أو الباكّلا و بطنج، لو شلغم و دبس. (خاصة إذا كانت في المناطق الشعبية و يخبط وياهه أغاني يوسف عمر) !

تاسعاً: رائحة مقاهي الرجال و تجي منها ريحة النراجيل (مو أم النكهات و الفواكه مال تالي وگت) و شاي أبو الهيل عالفحم، ووياههة صوت الزار و ضرب بولات الطاولي و
الدومنة عالميوزة و أم كلثوم.

عاشراً: رائحة صابون غار الحسني و غار العيسى مع ماء السخان النفطي، و الليفة اللي تشيل طبقة من الجلد
و هم عاشراً: رائحة الكستانة المخلوطة مع الصوبة العلاء الدين خاصة إذا الشعلة مو كلش زركة.
و بعد نسيت وحده مهمه: عريانات المشاوي على كورنيش الأعظمية يم أبو حنيفه. الدخان لأبو موزه؛ كباب و تكه و معلاك و جلاوي و حلولو و فشافيش ، ووياهه ماعون الطماطه شوي و البصل و العمبه شريس و الخضورات ، و الصينيه الفافون تجي للسياره (عاده عالبنيد) و نزل شيش ليه عوازه عمي. تتدلل أغاتي.و أبو الببسي شايل الصندوگ و يفتر و يجقجق بالفتاحه.

ترة صارت 12 مو 10 تعذرونه بس كلسع اتذكر شي لاخ،،،

عطرة إنتِ يا رائحة العراق، قبل أن تتلوثي بعبق البارود و دخان المولّدات و سواقي السيان الراكد ، والأسوأ من كل ذلك هو نتن المارقين​
 
Last edited:
Top